Անհայտ զինվորի շիրիմ-հուշարձանի հիմնման 98-րդ տարելիցին նվիրված միջոցառում

02 նոյեմբերի, 2023

Նոյեմբերի 2-ին Վարշավայի կայազորի հրամանատար գեներալ Տոմաշ Դոմինիկովսկու հրավերով դեսպան Ալեքսանդր Արզումանյանը մասնակցեց Անհայտ զինվորի շիրիմ-հուշարձանի հիմնման 98-րդ տարելիցին նվիրված միջոցառմանը։

Հայրենիքի ազատության համար մղվող պայքարի խորհրդանիշ համարվող շիրիմ-հուշարձանի համար 1925թ․ Վարշավա տեղափոխված աճյունն ընտրվել է ազգությամբ հայ Յադվիգա Զարուգիևիչովայի կողմից՝ որպես Լվովում պաշտպանական մարտերում նահատակվածի մայր․ Յադվիգա Զարուգիևիչովան ներկայումս համարվում է Անհայտ զինվորի խորհրդանշական մայր։

Հանդիսավոր արարողությանը, որին ավանդաբար դիվանագիտական կորպուսից մասնակցում է միայն Լեհաստանում Հայաստանի դեսպանը, ներկա էին Լեհաստանի Գլխավոր շտաբի պետի պաշտոնակատար, գեներալ-լեյտենանտ Պյոտր Բլազեուշը, Զինված ուժերի գլխավոր հրամանատարի պաշտոնակատար, գեներալ-լեյտենանտ Մարեկ Սոկոլովսկին, Վետերանների գրասենյակի ղեկավար Յան Կասպժիկը և այլ բարձրաստիճան պաշտոնյաներ, ինչպես նաև «Հայկական հիմնադրամի» տնօրեններ Մարտա և Մաչեյ Բոգոսևիչները։

Միջոցառման ավարտին դեսպանության կողմից ծաղկեպսակներ զետեղվեցին Անհայտ զինվորի շիրիմ-հուշարձանին և Վարշավայի կայազորի կենտրոնակայանի պատին փակցված Յադվիգա Զարուգիևիչովային և նրա որդուն՝ Կոնստանտիին նվիրված հուշատախտակի առջև։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր