ՀՀ Նախագահ Ս. Սարգսյանի աշխատանքային այցը Լեհաստանի Հանրապետություն

01 հոկտեմբերի, 2011

Ս.թ.սեպտեմբերի 29-ին Հայաստանի Հանրապետության Նախագահ Սերժ Սարգսյանն երկօրյա աշխատանքային այցով ժամանել է Լեհաստանի Հանրապետության մայրաքաղաք Վարշավա` Եվրամիության Արևելյան գործընկերության երկրորդ գագաթնաժողովին մասնակցելու նպատակով: Նույն օրն երեկոյան ՀՀ Նախագահը հանդիպումներ է ունեցել Ֆինլանդիայի վարչապետ Յուրկի Կատայնենի, ինչպես նաև ԵԱՀԿ Մինսկի խմբի համանախագահների հետ:
Սեպտեմբերի 30-ին Ս. Սարգսյանը մասնակցել է Եվրամիության Արևելյան գործընկերության գագաթնաժողովին, որտեղ հանդես է եկել բովանդակալից ելույթով` մասնավորապես նշելով. ,,Չլուծված հակամարտությունները պետք է ստանան իրենց արդարացի և կայուն լուծումը: Մենք հավատարիմ ենք մնում Լեռնային Ղարաբաղի հիմնախնդրի խաղաղ կարգավորման` ԵԱՀԿ Մինսկի խմբի եռանախագահների միջնորդությամբ ընթացող գործընթացին: Հայաստանի և ԼՂ համար խնդրի լուծման բանալին ժողովրդի ֆիզիկական անվտանգությունն ու նրա կողմից սեփական ճակատագրի ինքնուրույն տնօրինումն ապահովելու մեջ է: ԼՂ բնակիչները նույնքան եվրոպացի են, որքան մեզնից յուրաքանչյուրը: Նրանք մեծ ջանքեր են ներդնում իրենց հաստատությունները զարգացնելու հենց այն արժեքներին համապատասխան, որոնք մենք հռչակում ենք ընդհանուր, եւ դա, անշուշտ, արժանի է ուշադրության ու աջակցության,,:
Գագաթնաժողովի ավարտից հետո ՀՀ Նախագահը հանդիպում է ունեցել Եվրամիության արտաքին հարաբերությունների և անվտանգության քաղաքականության հարցերով գերագույն հանձնակատար Քեթրին Էշթոնի հետ, որի ընթացքում քննարկվել է Հայաստան-Եվրամիություն համագործակցությանը վերաբերող հարցերի լայն շրջանակ: Անդրադարձ է եղել նաև Ասոցացման համաձայնագրի բանակցությունների ընթացքին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր