«Zachęta» ազգային պատկերասրահում Ս. Փարաջանովի ցուցահանդեսի պաշտոնական բացման արարողություն

11 հոկտեմբերի, 2024

Հոկտեմբերի 11-ին Վարշավայի ժամանակակից արվեստի հեղինակավոր «Zachęta» ազգային պատկերասրահում տեղի ունեցավ Սերգեյ Փարաջանովի ցուցահանդեսի պաշտոնական բացման արարողություն։

Ողջույնի իր ելույթում դեսպան Ալեքսանդր Արզումանյանը նշեց, որ ցուցահանդեսը ոչ միայն հարգանքի տուրք է Սերգեյ Փարաջանովի հանճարեղ ժառանգությանը, այլև կամուրջ է Հայաստանի և Լեհաստանի միջև՝ հիշեցնելով մարդկանց միավորելու և երկխոսության ներշնչելու արվեստի զորության մասին: Ցուցահանդեսը արտացոլում է Ս․Փարաջանովի ոգին, ում ստեղծագործությունները, հատելով մշակութայինի և գեղարվեստականի սահմանները, անդրադառնում են համամարդկային թեմաների՝ սեր, կորուստ և ազատության ձգտում։

Ցուցահանդեսին ներկայացված են Սերգեյ Փարաջանովի Երևանում գտնվող թանգարանից բերված կոլաժներ, գծանկարներ, ցուցադրված են ֆիլմերից հատվածներ, այդ թվում՝ «Նռան գույնը» ֆիլմից դուրս մնացած հատվածներ։ Ցուցահանդեսին կից ծրագրում ներկայացված են նաև Ս․Փարաջանովից ոգեշնչված հայ, ուկրաինացի և վրացի ժամանակակից արվեստագետների աշխատանքներ։

Ցուցահանդեսն անց է կացվում Լեհաստանում Հայաստանի դեսպանության պատվավոր հովանու ներքո և գործելու է մինչև 2025թ․ հունվարի 12-ը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր