Դեսպան Սամվել Մկրտչյանի հանդիպումը Լեհաստանի Սեյմի նախագահի հետ

18 փետրվարի, 2020

Փետրվարի 18-ին կայացավ Լեհաստանում ՀՀ դեսպան Սամվել Մկրտչյանի հանդիպումը Լեհաստանի Հանրապետության Սեյմի նախագահ (մարշալեկ) Էլժբիետա Վիտեկի (Elżbieta Witek) հետ։

Փոխադարձ ջերմ և կառուցողական մթնոլորտում տեղի ունեցած հանդիպմանը հիմնականում քննարկվել են երկու երկրների բարեկամական հարաբերություններին և ընդլայնվող օրակարգային համագործակցությանը, միջխորհրդարանական կանոնավոր շփումների առավել ակտիվացմանն ու առևտրատնտեսական կապերի զարգացմանն առնչվող հարցեր:

Լեհաստանի խորհրդարանի ստորին պալատի նախագահն, ընդգծելով, որ Հայաստանը կարևոր գործընկեր է Լեհաստանի համար Հարավային Կովկասի տարածաշրջանում, նպատակային համարեց մեծ ներուժ ունեցող տնտեսական փոխանակումների և ներդրումների ոլորտում փոխշահավետ համագործակցության ծավալումը։ Նա միաժամանակ լեհական կողմի փորձի փոխանակման առումով Լեհաստանի Սեյմի անունից պատրաստակամություն հայտնեց հնարավորին աջակցություն ցուցաբերել հայկական կողմին՝ ընթացիկ լայնածավալ բարեփոխումների իրականացման ուղղությամբ:

Անդրադառնալով միջխորհրդարանական համագործակցությանը՝ զրուցակիցները մտքեր են փոխանակել խորհրդարանական դիվանագիտության արդիական հնարավորությունների և երկկողմ կապերի արդյունավետության ընդլայնման շուրջ: Երկուստեք կարևորվել են Հայաստանի և Լեհաստանի խորհրդարանների նախագահների, արտաքին կապերի մշտական հանձնաժողովների միջև ձևավորված և երկկողմ պատգամավորական բարեկամության խմբերի ակտիվ շփումները:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր