Լեհաստանի ազգային բանկի նախագահ Մարեկ Բելկայի գլխավորած ԼՀ պատվիրակության այցը ՀՀ

10 հունիսի, 2012

          Ս.թ. հունիսի 8-9-ը կայացավ Լեհաստանի ազգային բանկի նախագահ Մարեկ Բելկայի գլխավորած ԼՀ պատվիրակության այցը ՀՀ, որը նպատակ էր հետապնդում զարգացնելու Հայաստանի Կենտրոնական Բանկի հետ համագործակցությունը գիտելիքների և փորձի փոխանակման ոլորտում: Այցի ընթացքում ԼՀ ազգային բանկի ղեկավարը հանդիպումներ ունեցավ ՀՀ Նախագահ Սերժ Սարգսյանի, վարչապետ Տ. Սարգսյանի և Հայաստանի Կենտրոնական Բանկի նախագահ Ա. Ջավադյանի հետ:
         ՀՀ Նախագահի հետ հանդիպման ժամանակ Մ. Բելկան նշեց, որ Հայաստանի կենտրոնական և Լեհաստանի ազգային բանկերի միջև փորձի և տեղեկատվության փոխանակումը լավ հիմքերի վրա է դրված և այս հանգամանքը կարևոր է եվրոպական ինտեգրման ուղին որդեգրած Հայաստանի ֆինանսական համակարգի առավել կատարելագործման համար: ՀՀ Նախագահը՝ ընդգծելով հայ-լեհական կանոնավոր զարգացող հարաբերությունների բարձր մակարդակը, հույս հայտնեց, որ Լեհաստանի ազգային բանկի նախագահի այցը կնպաստի առևտրատնտեսական և ֆինանսական ոլորտներում երկու երկրների միջև համագործակցության զարգացմանն ու խորացմանը:
          ՀՀ վարչապետը զրույցի ընթացքում ընդգծեց, որ ի տարբերություն Եվրոպայի այլ երկրների Լեհաստանը ցույց է տալիս տնտեսական լավագույն արդյունքներից մեկը և այս փորձը շատ օգտակար կլինի Հայաստանի համար: Նա նշեց նաև, որ մեր երկրի հիմնական գործընկերներից մեկը Եվրոպական միությունն է, որի տնտեսական աճը և խնդիրներն իրենց ազդեցությունն են ունենում Հայաստանի վրա: Այդ համատեքստում, զրուցակիները հանգամանալից կերպով քննարկեցին Եվրոպայում առկա տնտեսական վիճակը, հնարավոր մարտահրավերներն ու խնդիրները: Կողմերն անդրադարձել են Հայաստանի կենտրոնական և Լեհաստանի ազգային բանկերի միջև համագործակցությանը, ԱՊՀ շրջանակներում տնտեսական քաղաքականությանը և ծրագրերին, Հայաստանի ու ԵՄ-ի միջև խորը և համապարփակ ազատ առևտրի գոտու ստեղծման համաձայնագրի արդյունքներին, մեր երկրում իրականացվող բարեփոխումներին:
            ԿԲ նախագահ Արթուր Ջավադյանը բարձր է գնահատել համագործակցությունը Հայաստանի կենտրոնական բանկի ու Լեհաստանի ազգային բանկի միջև: ԼՀ պատվիրակությանը նա ներկայացրեց Հայաստանի ֆինանսական համակարգի առանձնահատկությունները, գների և ֆինանսական կայունությանն ուղղված գլխավոր դրամատան կողմից վարվող քաղաքականությունը: Մարեկ Բելկան իր հերթին բարձր գնահատեց Հայաստանի կենտրոնական բանկի նախագահի հետ իր պարբերական շփումները, երկու հաստատությունների արդյունավետ համագործակցությունը: Այնուհետև նա հանդես եկավ «Լեհաստանը և «ԵՎՐՈ»-ն» զեկույցով՝ անդրադառնալով Լեհաստանի ազգային բանկի կողմից վարվող դրամավարկային քաղաքականությանը, լողացող փոխարժեքի քաղաքականության իրականացմանը: Կողմերը պայմանավորվեցին կանոնակարգված հիմքերի վրա դնել նման այցելությունների իրականացումը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր