ՀՀ պաշտպանության նախարարի այցը Լեհաստան

10 սեպտեմբերի, 2011

Ս.թ.սեպտեմբերի 7-ին ՀՀ պաշտպանության նախարար Սեյրան Օհանյանի գլխավորած պատվիրակությունն երկօրյա պաշտոնական այցով ժամանել է Լեհաստանի Հանրապետություն: Այցի ընթացքում ՀՀ պաշտպանության նախարարը հանդիպումներ է ունեցել Լեհաստանի պաշտպանության նախարար Թոմաշ Սեմոնյակի, ազգային անվտանգության բյուրոյի ղեկավար Ստանիսլավ Կոզիեյի և խորհրդարանի պաշտպանության հանձնաժողովի նախագահ Ստանիսլավ Վժոնտեկի հետ:

Հանդիպումների ժամանակ քննարկվել են հայ-լեհական երկկողմ ռազմական համագործակցության ընդլայնման հեռանկարները: Մտքեր են փոխանակվել նաև Հարավային Կովկասում ռազմաքաղաքական իրավիճակի, Լեռնային Ղարաբաղի հակամարտության կարգավորման գործընթացի, Աֆղանստանում անվտանգության աջակցության միջազգային ուժերի գործունեության վերաբերյալ:

Պայմանավորվածություններ են ձեռք բերվել Հայաստանի և Լեհաստանի միջև ռազմական ու ռազմատեխնիկական համագործակցության համաձայնագրերի ստորագրման, ինչպես նաև ռազմակրթական ոլորտում համագործակցությունն ընդլայնելու վերաբերյալ:

Այցի առաջին օրը Հայաստանի պաշտպանության նախարարի գլխավորած պատվիրակությունը մասնակցել է Կիելցե քաղաքում կազմակերպված պաշտպանական արդյունաբերության միջազգային ցուցահանդեսին, որի վերաբերյալ Սեյրան Օհանյանը իր տպավորություններն է ներկայացրել Լեհաստանի պաշտպանության ոլորտի պատասխանատուներին և քննարկել հայ-լեհական համատեղ ձեռնարկությունների ստեղծման, պաշտպանական գնումների, գիտահետազոտական և փորձակոնստրուկտորական աշխատանքների ոլորտում համագործակցության զարգացման հնարավորությունները:

Սեպտեմբերի 9-ին Սեյրան Օհանյանը հանդիպում է ունեցել նաև Վարշավայի հայ համայնքի ներկայացուցիչների հետ: Նախարարը ծանոթացրել է ներկաներին ՀՀ զինված ուժերի խնդիրների, զարգացման ծրագրերի, Հայաստանի անվտանգության մարտահրավերների հետ, ներկայացրել իրադրությունը հայկական և ադրբեջանական զորքերի շփման գծում:

Հայաստանի պաշտպանության նախարարն այցելել է նաև լեհական բանակի պատմության թանգարան, ծաղկեպսակ դրել Անհայտ Զինվորի հուշակոթողին:

Սեպտեմբերի 10-ին Սեյրան Օհանյանի գլխավորած պատվիրակությունը վերադարձել է Հայաստան:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր