Լեհաստան-Հայաստան խորհրդարանական բարեկամության խմբի անդամների ընդունելություն Վարշավայում ՀՀ դեսպանատանը

17 հունվարի, 2017

2017 թվականի հունվարի 12-ին Լեհաստանում ՀՀ դեսպան Էդգար Ղազարյանի նախաձեռնությամբ և հրավերով Լեհաստանում ՀՀ դեսպանատանը տեղի ունեցավ ԼՀ խորհրդարանում ձևավորված Լեհաստան-Հայաստան բարեկամության խմբի անդամների ընդունելություն: Ընդունելությանը մասնակցում էին Լեհաստանի Հանրապետության Սեյմի և Սենատի բազմաթիվ պատգամավորներ` Լեհաստան-Հայաստան բարեկամության խմբի ղեկավար Թադեուշ Վոժնիակի գլխավորությամբ: Ընդունելության մասնակցում էին նաև ԼՀ նախորդ գումարման Սենատի անդամ, Լեհաստան-Հայաստան բարեկամության խմբի նախկին ղեկավար Լուկաշ Աբգարովիչը, ԼՀ կառավարության և Ազգային ու էթնիկ փոքրամասնությունների համատեղ հանձնաժողովում հայ փոքրամասնության ներկայացուցիչ Էդվարդ Միեր-Ենդժեյովիչը, Հայաստանում Լեհաստանի նախկին դեսպան Թոմաշ Կնուտը, Լեհաստանում գործող մի շարք հայկական կազմակերպությունների ղեկավարներ և ներկայացուցիչներ: Ողջունելով հյուրերին` դեսպան Է.Ղազարյանը շնորհակալություն հայտնեց դեսպանության հրավերը չմերժելու և ընդունելությանը մասնակցելու համար: Դեսպանի խոսքերով երկու երկրների և ժողովուրդների փոխհարաբերություններում խորհրդարանական դիվանագիտությունն ունի չափազանց կարևոր դերակատարում: Ընդունելության ժամանակ ելույթներով հանդես եկան նաև Լեհաստան-Հայաստան բարեկամության խմբի ղեկավար Թադեուշ Վոժնիակը, ԼՀ կառավարության և Ազգային ու էթնիկ փոքրամասնությունների համատեղ հանձնաժողովում հայ փոքրամասնության ներկայացուցիչ Էդվարդ Միեր-Ենդժեյովիչը, իսկ Կրակովի Յագելոնյան համալսարանի հայազգի ուսանողուհի Ռաֆաելա Մարգարյանը մասնակիցներին ներկայացրեց շնորհանդես Հայաստանի մասին, որից հետո տեղի ունեցավ հայկական ուտեստներով և խմիչքներով հյուրասիրություն:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր